Este novo libro de García Teijeiro está composto de catro relatos: "A cidade escura", "O señor do violín", "Un rapaz diferente" e "O lugar sen nome".
"A cidade escura" é Tralaponte, unha cidade maldita onde non existen as cores e todo está tinxido de escuro. Os habitantes viven sumidos na tristeza e na sombra. Este é o castigo que ten que pagar a veciñanza por expulsar os vendedores ambulantes de cor da vila.
En "O señor do violín" cóntase a fascinación que Mariña sente por un vello bohemio que toca na rúa e que o resto dos habitantes ignoran.
"Un rapaz diferente" é a historia da marxinación dun rapaz na escola por ser de distinta raza, ata que un compañeiro descobre toda a sensibilidade e imaxinación que esconde. Ao final convértense en bos amigos.
Finalmente en "O lugar sen nome" danse cita os personaxes dos contos anteriores nun utópico lugar onde a xustiza e a beleza venceron á escuridade e á discriminación.