Concha Blanco: Cantos da rula
Ilustracións de Xosé Vizoso
Col. Arume de poesía para nenos. Ediciós do Castro. Sada - A Coruña, 2008
IV Premio Arume de poesía para nenos 2007

Colección de poemas amables e sinxelos cunha estrutura poética elemental. O ritmo áxil, a rima sonora e os paralelismos buscan a comunicación directa como unha introdución das primeiras idades lectores ao mundo poético. Tematicamente, o mundo animal preséntase nunha relación afectiva coa gaivota, o grilo ou a rula cantora; a querida familia aparece co avó, a nai ou o pai que chega en tren; a Terra móstrase fermosa na Costa da Morte e Galicia en xeral; o amor e os soños teñen o seu lugar tamén no mundo animal e o sol e a lúa son amigos, aínda que as luces dan calor e as sombras frío, porque a noite pode roubar a alegría.
Son cantos dende a sinceridade: "O poeta,/ o escritor, / canta os seus sentimentos / como fai o reiseñor".