Conxunto de trinta e oito cancións concibidas para un uso escolar. Con cada unha delas figura a notación musical e indicacións para o seu uso nas áreas de plástica ou lingua, matizando a súa posible escenificación, individual ou en grupo, e acompañamento instrumental, especialmente con elementos sinxelos de percusión. Ademais, tamén se aclara o significado de algúns termos menos coñecidos polos receptores infantís.
A temática é variada: desde a inevitable presencia de animais ata compoñentes do espacio urbano como o semáforo ou o ascensor, ademais de cantigas de acompañamento de actividades cotiás ou conceptuais en torno á escola, a lingua galega, o Nadal ou as pergrinaxes. Nalgunhas, ritmos como o alalá, a pandeirada ou a muiñeira serven de práctica para a aprendizaxe musical.
A sinxeleza estilística baséase en estructuras fónicas repetitivas nas que a onomatopea e outros elementos eufónicos facilitan a súa función fundamental de oralidade.