Bea, rapaza tímida e pechada, atopa unha amiga en Amaia, que acaba de instalarse coa súa familia na cidade, cando lle leva o estoxo escolar que esta perdera na rúa. Entre as dúas axúdanlle a un rapaz a recuperar o seu canario e entón ocórreselles a idea de facer un club de nenos: poñen un buzón nunha árbore, no que os nenos poden deixar as súas queixas ou problemas, que elas intentarán solucionar. E resúltalles moi ben: localizan un pequinés perdido, descobren o ladrón dos cartos dunha aula, recuperan a variña máxica do mago pobre Abracadabra, conseguen traballo para o pallaso no paro Froitoso...
Enteirado un xornalista do seu labor, publica unha reportaxe na prensa local que fai que as compañeiras da aula admiren a Bea. Mesmo dúas delas quedan ao cargo do club mentres Bea e Amaia marchan un mes de vacacións á aldea cos dous fillos do dono dun restaurante divorciado que non acaban de asumir a ausencia materna. Na casa dos avós dos rapaces, disfrutan entre os animais en plena natureza, aínda que tamén viven momentos de apuro cando un cabalo desbocado provoca un accidente, no que a penas se mancan gracias á valente intervención de Bea. Pero o mellor foi, certamente, que descubriron a dous ladróns de bancos, alertando a policía.
Á súa volta, agradecido, o pai dos rapaces alúgalles un soto preto da árbore na que teñen o buzón para que o utilicen como local do club. Ademais, como agora xa son bastantes os colaboradores, van poder solucionar moitos problemas dos rapaces.