Tres obxectos dunha tenda de regalos (un gancho do pelo con forma de bolboreta, un prendedor de lapela coa figura dun cabaliño do demo e un miniespertador), que poden falar e mesmo namorarse, ven alterada a súa situación coa chegada dunha bruxiña de trapo. Pero non hai nada que temer, pois é unha bruxa boa, das da sorte. Coa súa maxia fai que se cumpran os desexos de todos. Así, logo de que superen as probas resolvendo adiviñas ou un encrucillado, fai que un rapaz compre o minisespertador como agasallo para unha rapaza que o coloca onde el soñara, nun andel de libros; e cumpre o desexo do gancho-bolboreta e o prendedor-cabaliño do demo de ir vivir xuntos o seu amor nun parque. Mais como os cazabolboretas reparan na beleza dela e intentan capturala, acordan tornar á tenda.
Cómpranos entón uns rapaces como adorno para o pelo e o colo da sobrecamisa da súa avoa, que vive na casa na que tamén compraran o miniespertador e mais a propia bruxiña. De tal xeito que os catro poden seguir xuntos, mantendo a súa amizade.