Coxi vive co seu can Sol un día de aventuras no monte próximo á súa cidade. Neste territorio non tan idílico nada é o que parece: uns croios forman unha agresiva compañía marcial, outra pedra pártese soa para devolver un favor e o mordomo do misterioso pazo (que non castelo) se cadra non o é (¿ou serao?). Por iso o feroz Lobo Bolo non consegue asustar coas súas dez variedades de ouveos: malvive como fera única do Monte Lobeira gracias ao contrato cun mouro (pintado) especulador.
Os perigos axexan por todas partes ata chegar ao Pasadizo Secreto. Menos mal que o propio lector cos seus amigos pode saber cómo conxuralos. E que a Bruxa Cuxa actúa eficazmente coa súa sabedoría nada evidente. (Por certo, ¿que dirán os rumorosos?)
De sorpresa en sorpresa, entre xogos verbais, chegamos ao último xogo, que se inclúe como apéndice no propio libro.