Érase unha vez unha selva cunha árbore enorme, a meirande do mundo, na que se instalou unha pantera, fermosa pero caprichosa e déspota. Un día chegaron os monos e quixeron quedar tamén. Ela púxolles como condición que lle trouxesen foita rica. Logo, dúas serpes, ás que llelo permitiu a cambio de saborosa carne. Despois, milleiros de formigas, que se comprometeron a manterlle limpa a árbore. Máis adiante, as abellas, que lle facilitarían mel para o almorzo. E, finalmente, deixou ficar tamén aos esquíos a cambio de informala de canto ocorría na selva.
Un día descubriu que no alto da árbore estaban instaladas unhas aguias imperiais cos seus niños. Non lle pediran permiso, polo que foi chamarlles a atención. Mais como as pólas eran moi pequenas, caeu a pantera dende o alto. Menos mal que as aguias a recolleron voando antes de que se estampase contra o chan. Entón aprendeu a non desprezar a ninguén e non crerse tan lista, pois sempre pode haber alguén mellor.