Preséntanse dúas aventuras do simpático robot que se deu a coñecer en Un robot pequeno.
Como Sabela e Fermín van ir coñecer a Denís, o fillo que acaban de ter uns amigos, deixan o laboratorio ben pechado para que o traste SF-2 (o robot que eles crearon) non lisque a correr unha desas aventuras que tanto lle gustan (o seu predecesor, SF-1, roubárano e logo de exhibilo nas festas deixárano inservible). Sentado na ventá enreixada, a xente da rúa mírao e veo como un xoguete ou un ferragancho, até que pode falar con un rapaz e unha rapaza (que non teñen máis de 11 anos, por iso se pode comunicar con eles), aos que lles conta a súa tristeza porque a súa amada Sabela seguramente ha querer ter un fillo co envexado Fermín logo de coñecer o dos amigos. O rapaz dálle un consello para evitar que entón o ignoren: que faga trasnadas, facéndose notar. Por iso o robot prepara un cubo con auga enriba da porta, para que lle caia a Fermín en canto entre.
Un domingo SF-2 lisca do laboratorio ao mencer e atopa onda unha casa abandonada un rapaz portugués, que lle conta: sen papeis, acaba de morrerlle a nai atropelada e nunca coñeceu o pai, polo que sobrevive de esmola e de pequenos roubos. Aínda que o robot lle di que se van polas festas pode gañar cartos á conta súa, como o rapaz non chega aos doce anos, van para onda Fermín e Sabela. Os catro irán celebrar esa noite o Lume Novo, pois ao día seguinte é San Xoán.