Como David e Marcos non queren ir deitarse, pois prefiren ver a película da tele, o avó Gundar cóntalles unha historia. Mais non será a única noite, pois ante o interese dos rapaces, ten que continuar varios días ata rematala. Seica lle ocorreu a el no propio Rillobre, cando ía con tres amigos e un can:
Dando un paseo ata o monte Lobeira, atoparon a cova de Pedro Chosco, tan sorprendente como os seus habitantes: animais faladores, ananos... e, sobre todo, a cerva Alba, que lles encargou catro cousas que precisaba para desenfeitizar a un grupo de anciáns do Consello do Sabio Ogam, cristiáns transformados en mouros por un meigallo. Unha vez que lle axudaron a conseguilo, agasallounos coa súa filla, a cerva Branquiña, que ten o poder de adiviñar o que ocorreu ou vai ocorrer, segundo a comida que lle dean. Pero pouco durou con eles, pois enteirado o alcalde pretendía poñela a disposición dos veciños, cobrando, por suposto. Tiveron que a volver ao monte e nunca máis dela souberon nin de Pedro Chosco.
Naqueles días do conto, os dous rapaces descubriron un misterioso personaxe pola rúa, que resultou ser Gundemaz, cabaleiro da Táboa Redonda enfeitizado por Merlín e Morgana, que eles foron quen de desenmeigar cos mesmos recursos que a cerva do conto. Desapareceu logo, nomeándoos antes Cabaleiros de Camelot.
Anciáns xa os dous rapaces, tamén eles lles contaron esta historia aos seus netos.