O primeiro relato, Sucinto informe, de Xavier Alcalá desenvólvese nunha oficina de obras públicas na que os desexos de ascenso dun subdirector fan que intente utilizar o nepotismo nunha contratación para acabar co seu xefe. Pero un asasinato relacionado co tráfico de drogas crúzase na rápida reacción do director, quen, enteirado casualmente no retrete, vai á obra e acaba provocando a morte por infarto do seu rival.
Darío Xohán Cabana presenta en Noticias de algures tres historias "veraces" de "moradores": de como un grande laxedo é un Niño de Estrelas Anduriñas onde aterraron os homes do espacio dos que descendemos os galegos; dun can que asiste ás clases co seu neno e só non soporta cando empezan a cantar a táboa de multiplicar e dun "foristeiro" misterioso, un "ninguén que veu de ningures".
Pecha o libro Xelucho Abella Touciño con Perdido, no que un can vagabundo que leva días durmindo á porta da casa do protagonista unha mañá intenta botárselle á gorxa, e perségueo logo. Libra del visitando un defunto, que ten a súa propia cara. De volta na casa, o can consegue sorprendelo definitivamente. Resulta ser un pesadelo, aínda que hoxe ten un ollar malévolo...